Biskop Konstantin van die Afrika-Eksargaat, ons biskop, is onlangs as Metropoliet gewy. Nog baie jare, Wladika!
Besoek aan ons kerk in Robertson deur ons biskop, Wladika Konstantin
Verlede Woensdag het ons biskop, Wladika Konstantin, ons kerk in Robertson vereer met ‘n besoek. Hy was hier uit Moskou en vergesel deur vr. Daniil van die Russies-Ortodokse Kerk in Midrand, vr. Stefan van Moskou en sub-diaken Wladislaw. Na ‘n moleben ter ere van die Heilige Maria die Egiptenaar, die beskermheilige van ons kerk wat almal diep geraak het, het ons vir middagete heerlik saamgekuier by Christina’s op die wynplaas Van Loveren. Hieronder is ‘n paar foto’s van die besondere geleentheid.
‘n Foto geneem deur vr. Daniil: Sub-diaken Wladislaw, vr. Zacharias, Wladika Konstantin en vr. Stefan.
Filed under Uncategorized
Kersboodskap van ons Biskop 2023/4
Die Kersboodskap van die Waarnemende Patriargale Eksarg van Afrika,
Biskop Konstantin van Zaraisk
aan die priesters, kloosterlinge en al die gelowiges van die Patriargale Eksargaat van Afrika van die Russies-Ortodokse Kerk
Liewe vaders, broers en susters! Ek wens julle van harte geluk met die groot fees van ons Here se Geboorte! Met groot afwagting het ons na hierdie dag uitgesien en ons daarop voorberei. Nou het dit gekom. “Christus word gebore, loof Hom! Christus kom uit die hemel, gaan Hom tegemoet!” smeek die Heilige Kerk. ‘n Onpeilbare wonderwerk het plaasgevind, die ewige God het Mens geword. Die Seun van God, die Here Jesus Christus, het na ons gekom om ons te reinig, te genees, en vir ons die pad na die Hemelse Koninkryk oop te maak. Christus het vir ons verlossing en die ewige lewe gebring. Hoe sal ons hom ontmoet? Ons ontmoet die Kindjie Jesus met vreugdevolle aanbidding en met goeie Kersgebruike. Ons werk daaraan om ons doen en late reg te stel, en probeer met sorg let op ons naaste en sy behoeftes. Ons vra die Here om in ons lewens in te kom en dit te herskep. Kom ons laat Christus dan toe om in ons lewens in te gryp, dit te rig en dit vol te maak, soos wat die Woord van ons Here dit stel: “Ek is die weg en die waarheid en die lewe” (Jn. 14:6). Kom ons volg Christus en leef eerlik, regverdig, op ‘n Christelike wyse, volgens God se gebooie, in vrede en met liefde vir ons naaste.
Ek wens almal God se bystand in jul lewens en werk toe, en ook die vertroosting en die barmhartigheid van ons gebore Verlosser.
Ek bid dat God julle sal seën.
Biskop Konstantin van Zaraisk,
Vikaris van die Patriarg van Moskou en die ganse Rus
Waarnemende Patriargale Eksarg van Afrika
Januarie 5, 2024 · 9:27 vm
YouTube-kanaal vir die Ortodoksie in Afrikaans
Francois Smuts het onlangs ‘n Youtube-kanaal begin vir sake rakende die leer van die Ortodokse Kerk. Besoek dit gerus! https://www.youtube.com/channel/UCqUZ5bd5CrR5Ggw1mB6YJfg
Dan is al ons CD’s nou ook op YouTube en op Spotify, by die volgende adresse:
https://www.youtube.com/channel/UC6GC7WGkCJJLIITsMu6OzbA
Filed under Uncategorized
Kersboodskap van die Patriarg van Alexandrië 2020
Vertaal deur vr. Johann Rossouw van Bloemfontein
Ref. No. 140/2020
THEODOROS II
DEUR DIE GENADE VAN GOD
POUS EN PATRIARG
VAN ALEXANDRIË EN DIE GANSE AFRIKA
TOT DIE VOLHEID VAN DIE APOSTOLIESE
EN PATRIARGALE TROON VAN ALEXANDRIË
GENADE EN VREDE
VAN ONS HERE EN GOD EN SALIGMAKER JESUS CHRISTUS
GEBORE IN BETHLEHEM.
“Kom alle gelowiges, laat ons sien waar Christus gebore is…”
Heiligste broeders en wedergebore kinders in die Here,
Christus is gebore!
Met die gesang se oproep van die Geboortemette, word ons regstreeks bekendgestel aan die kernbetekenis van hierdie groot Christusfees, synde waar Christus gebore is!
Baie mense mag vinnig wees om te antwoord dat hy gebore is in Bethlehem, Judea. Dog, is dit die regte antwoord op die vers van die gesang meer as 2000 jaar sedert daardie gebeurtenis?
Christus is gebore! Hierdie jaar en op elke oomblik in die Kerk. Weer eens sal die liggies en vrolike klanke stroom oor die markte wat deur die pandemie die skrik op die lyf gejaag is. Die versierde strate sal die tuiste word van ons angs, wat opmerklik sal wees onder die wandelende skares. Heerlike gebak skyn nie in staat te wees nie om die bitterheid wat ons gevoel het, te verdryf. Die heerlike kos staan onaangeraak op die feestafel. Ongeag hoe luid musiek ’n sekulêre viering aankondig, is dit nie in staat om die krete van ons siele uit te doof nie.
Dog, in die krip regeer ’n Vrede sonder grense, ’n Wysheid wat onsterflik opgedaag het, ’n Mag wat sigbaar weerloos dog opgestane is! Waar is dan hierdie krip vir die mens om hoop en vreugde van te put? Dit is nêrens anders as ons Ortodokse Kerk nie! Wil jy sien waar Christus gebore is? Christus was en word gebore in die Kerk! Ons Kerk – die ewige, die tydlose, die gemeenskap van die Vader en van God en van die Heilige Gees – is die krip waar die vleesgeworde Seun van God en die Seun van die Maagd, ons Here Jesus Christus, gebore is.
Met die Heilige Gees in hul harte het die Goddraende Apostels met ’n staf en ’n skouersak uitgegaan om oor die lengte en breedte van die wye heelal te verkondig dat die krip in Bethlehem die Kerk van Christus is – die plek waar die heiligste gebeure plaasvind. In die loop van die eeue, terwyl die Apostoliese inspanning om in elke era die lewende getuienis van God se Waarheid uit te dra, voortgegaan het, het baie mense deur staat te maak op hulle eie logika, selfregverdiging en wêreldse mag gepoog om ons Here van die Kerk te skei. Talle mense bely hulle liefde vir Christus, maar hulle glo nie in die Kerk nie. Hulle glo in God, maar die Kerk is oorbodig. Hulle hou van Kersfees, maar hulle is hartseer wanneer dit verby is.
Sonder die Kerk is ons ewe min in staat om Christus lief te hê as om oor Hom te praat. Deur haar Heilige Ekumeniese Konsilies, die Plaaslike Konsilies, haar Tradisie, en haar gemenereg het die Kerk Christus in die bewustheid van haar volheid gevorm. Sonder die Kerk is Christus waardeloos vir die gelowiges. Dit is deur die Kerk wat ek glo. Dit is deur die Kerk wat ek aanbid. Dit is deur die Kerk wat ek die ware doel van my bestaan ken en verken. Dit is aan Christus se Kerk – die Een, Heilige, Katolieke en Apostoliese Kerk – wat die Heilige Vaders die Ark van die Nuwe Testament en die erflating van Genade oorgedra het. Gevolglik is dit slegs die Kerk wat red, en word sy nooit deur ons gered nie. Sy heilig, maar word nie geheilig nie. Sy onderrig en benodig geen onderrig van enigiets eindig nie.
Die lering van die Kerk, die ewige prediking van die Kerk, is die ware God, presies soos Hy vir ons en vir ons redding vlees geword het. Gevolglik is die Allerheiligste Liggaam van die Kerk nie ’n hipotetiese begrip of ’n fiktiewe verhaal nie, maar word sy bepaal deur alles wat heilig en onvervreembaar is soos bepaal deur haar ervaring en praktyk deur die eeue. Die oneindige Kerk as die Liggaam van Christus beskik dus oor die grense van die heilige regulasies van elke plaaslike Kerk, waarbinne die ewige, oneindige Christus noulettend bewaak word. Die regte kerkleer is ’n veilige hawe en ’n knusse wiegie in ’n kerkwêreld wat weens vreemde motiewe vinnig beweeg in die rigting van die ontheiliging van ons geskiedenis.
Ons hier in Alexandrië, in the Groot Stad van Athanasius en Kyrillos en soveel groot besingers van die God-Menskind, in die wieg van die teologie en die filosofie, in die wieg van die letterkunde, van die kultuur en die kunste, weet uit ervaring hoe om na die voorbeeld van die Kerk ons hart en ons bestaan te omvorm tot ’n knusse wiegie om Hom te huisves wat die lig van die Waarheid in Egipte geskyn het, die Groot Vreemdeling van die Geskiedenis, ons Here Jesus Christus.
Ons is bewus van en word ’n toevlug vir die pyn, die trane en die behoeftes van die arm, dog geseënde vrugte van ons vermoeide Sending. Die ganse Afrika word elke oomblik ’n wieg van hoop en verwagting. Vanaf hier, die antieke Setel van die Heilige Apostel en Evangelis Markus, word ons die bewaarders en beskermers van ons swak en vervolgde broers en susters, omdat dit is wat God beveel het.
My kinders, Christus-agtige kinders van die Kerk, wanneer hulle julle vra om hulle te wys waar Christus gebore is, moet julle antwoord, Hy is in die Kerk gebore, Hy is in ons harte gebore, ons is in Hom weergebore, deur Hom lewe ons, ons is volledig Syne, ons het Hom nie slegs gedurende hierdie feesgety nie, maar op elke oomblik, in elke omstandighede, of ons nou leef of sterf!
’n Vreugdevolle en Heilige Geboortefees! ’n Onbederflike, ewige Kersfees van hoop met optimisme, eensgesindheid, liefde en deelgenootskap vir almal!
Laat ons dan volg waar die ware, standvastige Ster van die Kerk ons lei!
Baie geseënde jare in gesondheid vir almal!
† THEODOROS II
Pous en Patriarg van Alexandrië en die Ganse Afrika
In die Groot Stad van Alexandrië
Geboortefees, 2020
Filed under Uncategorized
Cd’s in Afrikaans op YouTube
Die Afrikaanse Ortodokse Liturgiese tekste wat ons al opgeneem of laat opneem het, is nou op YouTube! Besoek dit gerus!
https://www.youtube.com/channel/UC6GC7WGkCJJLIITsMu6OzbA/
Filed under Uncategorized
Program op Kyknet deur Khakiproduksies
‘n Nuwe program oor die geesteservaringe van Afrikaanssprekendes wat nie lidmate van die drie Susterskerke is nie, word tans vervaardig deur Khakiprodukies, onder leiding van Wynand Dreyer, vervaardiger van onder andere “Megaboere”. Verlede naweek was die vervaardigingspan hier by ons op Robertson vir die skiet van die Ortodokse gedeelte van die program, wat waarskynlik eers in 2020 uitgesaai sal word. Die besoek van hierdie span was ‘n aangename ervaring vir almal, en Wynand het tydens die opname ook ‘n hele aantal foto’s geneem waarvoor hy baie goedgunstiglik toestemming gegee het dat dit ook op ons webblad geplaas kan word. Al die foto’s word sonder byskrifte geplaas vir wie ookal sou belangstel om iets te sien van wat verlede week hier by die Bedehuis op Robertson plaasgevind het. Daar is ‘n hele aantal werklik pragtige foto’s van die kapel, die mense betrokke en die omgewing.
Filed under Afrikaans-Ortodoks, Die Bybel, Liturgiese jaar, Ortodokse Kerk
Foto’s van die Kapel en die Bedehuis
‘n Besoeker, Wilferd Duckitt, het onlangs ‘n klompie pragtige foto’s geneem van die Bedehuis, kapel en omgewing en goedgunstiglik toestemming verleen om daarvan op ons webblad te plaas. Hier is ‘n klompie:
Die ingang na die priester se woonplek
Die paadjie van die hek af na die Bedehuis
Die Langeberge in die agtergrond by die Bedehuis.
Die Altaar
Die koepel
Nog een van die koepel
Die ikoon van die Verheerliking op die Berg
Die pad deur die wingerd aan die onderkant van die Bedehuis
Die onderkant van die Bedehuis
Die agterkant van die Bedehuis en kapel met die drade van die wingerd langsaan
Ikoon van die Opstanding
Uitsig op die Langeberge vanaf die dam aan die pad se kant van die Bedehuis
Filed under Afrikaans-Ortodoks, Die Bybel, Liturgiese jaar, Ortodokse Kerk, Uncategorized
Christus het Opgestaan! Waarlik, Hy het opgestaan!
DIE PAASBOODSKAP VAN ONS PATRIARG 2019
THEODOROS II
DEUR DIE GENADE VAN GOD POUS EN PATRIARG VAN ALEXANDRIË
EN DIE HELE AFRIKA;
AAN DIE VOLHEID VAN ONS APOSTOLIESE EN PATRIARGALE TROON:
GENADE EN BARMHARTIGHEID VAN ONS VERRESE HERE EN GOD EN HEILAND JESUS CHRISTUS
Ons glo “in een Here Jesus Christus …… wat gely het en begrawe is opgestaan het”.
My liewe kinders,
Ons vier met gejubel en geestelike vreugde die lewegewende Pasga! “Pasga van behae, Pasga, die Pasga van die Heer. ‘n Pasga al-eerbiedwaardig het vir ons opgegaan. Pasga! Laat ons mekaar met blydskap omhels. O Pasga, losprys van verdriet!”
Ons ontken egter nie die verskriklike werklikheid van ons alledaagse lewe nie; die pyn, die ongeregtigheid, die siekte. Pasga is ‘n unieke, dinamiese gebeurtenis. Verdriet en rou word verdryf deur die glans van die goddelike Lig en oorwinning van die lewegewende Opstanding.
Ons weet dat baie van ons broers en susters in hierdie tyd finansieel versmoor word en dat ander op die rand van armoede verkeer.
Onveiligheid en allerhande ander struikelblokke, met die katastrofiese gevolge daarvan op die lewenstandaarde van ons mense, is ‘n aangeleentheid vir die hele samelewing, waar die slagoffer nie langs die pad lê en die aanskouers van hierdie drama aan die ander kant van die pad verbygaan nie, maar waar ons almal as mede-reisigers die gevolge dra van dit wat ‘n uitwerking op almal gemeenskaplik het. In die heel eerste plek roep hierdie verskynsels, deur die bewuswording van tekortkominge om op liefdevolle en samewerkende wyse daarmee tred te hou, en die gebrek daaraan, almal tot self-ondersoek op. Om ons woed oorloë en kom rampe voor. Gebiede naby ons word oorweldig deur vlugtelinge en immigrante, wat die skaakmat van politieke en finansiële dienstigheid van die wêreldmagte ervaar.
Te midde van die donkerte wat deur menslike lyding veroorsaak word, straal die ewige lig van die Opstanding van die Heiland met heerlikheid. Volgens die Ortodoksie is elke mens ‘n unieke en onherhaalbare persoonlikheid, ‘n beeld van God, ongeag kleur, taal, godsdiens en kulturele agtergrond. Dit vra om opregte hulpverlening aan die mens, en sekerlik aan die behoeftiges, met volle verwysing na die verlossende gebooie van die Skepper. Die Kerk is die Liggaam van Christus. Binne haar, “as een lid ly, ly al die lede saam” en omdat God liefde is, “bly hy wat in liefde bly in God en God in hom.”
Geloof in die Here “wat gely het en begrawe is en opgestaan het”, en die eksistensiële verhouding met Hom, keer geduld en uithouvermoë , geestelike krag en innerlike vrede vir die siel af. Terselfdertyd moedig hierdie geloof ons aan om op liefdevolle wyse naas diegene wat ly te bly. Agting en versorging vir hulle wat gekwel word, gee op die mees wesenlike wyse uitdrukking aan ons aanbidding van Christus wat “vir ons verlossing” opgewek is. Ons begrip van die smarte van ons naaste en sorg vir hul verligting, bewys ons geloof in die Opstanding en ons praktiese liefde soveel meer.
My kinders “CHRISTUS HET OPGESTAAN! “Dit is ‘n dag van liefde. Die hel is oorwin (…..) Elke gesig straal, volgens die Griekse digter Dionisios Solomos, vanweë die heilige kers wat Christene in hul hande hou”. Mag die Verrese Heer, die Leier van die Lewe, ons hoop, liefde, krag en vreugde skenk in die ewige lig van sy Opstanding. Terwyl ek julle almal die seën van die Verrese Christus, die Oorwinnaar oor die dood, skenk, groet ek elkeen van julle persoonlik met die Opstandings-segelied: CHRISTUS HET OPGESTAAN! WAARLIK, HY HET OPGESTAAN! terwyl ek julle almal “van die Here” alles wat goed en aangenaam is toewens “vir alles wat ons vir Hom doen”.
Met die seëninge van die Opstanding,
(Geteken deur) +Theodoros ll
Pous en Patriarg van Alexandrië en die Hele Afrika
Filed under Afrikaans-Ortodoks, Die Bybel, Liturgiese jaar, Ortodokse Kerk, Uncategorized
Kersboodskap van ons Patriarg
THEODOROS II
DEUR DIE GENADE VAN GOD POUS EN PATRIARG VAN ALEXANDRIË
EN DIE HELE AFRIKA;
AAN DIE VOLHEID VAN ONS APOSTOLIESE EN PATRIARGALE TROON:
GENADE EN BARMHARTIGHEID EN VREDE VAN ONS HERE EN GOD EN HEILAND JESUS CHRISTUS WAT IN BETHLEHEM GEBORE IS
Die Geboorte van Christus!
Dit is nie ‘n roemryke bladsy uit die geskiedenis van die mensdom nie, en ook nie ‘n mooi viering wat die teenswoordige verfraai nie, maar ‘n gebeurtenis gerig op die ewigheid, waarin ons lewens vervolmaak word, ons lewens wat op soek is na verbetering en redes vir regverdiging.
Wat meer as twee duisend jaar gelede in die Heilige Land plaasgevind het, is eenmalig en kan nie herhaal word nie, wat bewys word deur die moontlikhede wat hulle voordoen en die geleenthede wat geskenk word. Daar het hemel en aarde, die engele en die liedere, die ster en Hy , toe ontmoet. Toe het God die mens ontmoet, as die God-mens, nie (as die God) van oordeel nie, maar van verandering; nie (as die God van) die geskiedenis nie, maar van verlossing; nie (as die God) van verwerping nie, maar van versoening.
Voor die krip van Christus verander alles. Die magtiges word swak, die rykes arm, die wyses onkundig. Almal begryp hul nietigheid, hul onvolmaaktheid en hul wesenlik brose krag. Daar Christus Self neerdaal en een met ons word, verloor alle titels hul waarde, posisies hulle heerlikheid en ampte hul krag.
Hierdie ontmoeting word ook op die vasteland van Afrika nie net op 25 Desember elke jaar ervaar nie, maar elke minuut en oomblik. Die kleinste uithoekie daarvan word ‘n nederige grot vir die Geboorte van Christus en elke sendeling Sy nederige bedienaar en ‘n ware vertolker van die boodskap wat Hy bring, dié van vrede en samewerking tussen God en die mensdom en mense onderling, in een gesin, in Sy Kerk.
Die ster wat daardie nag in die hemel geskyn het, kom strooi oorvloedig lig in die harte van almal wat dag en nag in die velde van die Ortodoksie arbei – hier in ons Afrika – en begeester tallose siele, ongeag ouderdom en oorsprong, om die Evangelie van die Here te leer of daarin onderrig te word. Dit is hulle almal wat bydrae tot die liturgiese, geestelike, maatskaplike, opvoedkundige, humanitêre werk van ons Patriargaat wat duisende siele elke dag aanvaar. Hulle bied hul kennis en hul inspanning sodat Christus gebore mag word in die siele van ander mense en hul arbeid ontvang ryke seëninge van die Goddelike Kind.
Die vreugde van alles wat ons weereens ervaar, asof dit vandag gebeur, is duidelik in die harte van almal. Van my eie hart – as Primaat van die Apostoliese Troon van die Evangelis Markus – tot dié van elkeen van my medewerkers, die geestelikes van alle stande en die leke in elke amp.
Ons seën en bedank veral die plaaslike Staatsowerhede wat alles wat ons bied aan die inwoners van hierdie skone gebied van ons planeet goedkeur, daartoe bydra en hul daarin verheug.
Ons glo en gee Christus, Hy wat hulle ontmoet wat na Hom verlang, Hy wat hulle bemagtig wat Hom volg, Hy wat geopenbaar is aan hulle wat in Hom glo. Vir ons Patriargaat is die Geboorte van Christus nie ‘n heilige herinnering, ‘n uur van formele wense oordra, ‘n geleentheid vir blote nadenke nie. Dit is ‘n feit wat voortduur, wat lewenskragtig is, met leerstellings. Dit het die wil, dit bevat die getuienis, dit behou die reg om voort te gaan om elke Sendingpoging in die Geboorte van Christus, elke plek in ‘n Bethlehem en elke hart in ‘n grot te verander.
THEODOROS ll
Pous en Patriarg van Alexandrië en die Hele Afrika
In die Groot Stad Alexandrië
Die Fees van die Geboorte van Christus 2018
Filed under Uncategorized
Bedehuis Bethanië 